أبكتب لك مع ابياتي كلام مشفرٍ تشفير ...
لعلك تفهم المعنى ورمزٍ صاغه الساني
انا اللي عاشقه خلٍ عشق غيري بلا تقدير ...
تمنيته وهو ناسي واحسب انه تمناني
سقاني كاس بيدينه طلع كاس الهوى تخدير ...
احسبي مالكه قلبه وهو مع واحدٍ ثاني
انا نفسي على الذله تعاف الزين لو هو غير ..
واباطا قلبي برجلي إذا إنه تحداني
أنا أبنسى عنا الماضي وأبرحل دونما تبرير
عسى الله يسعد أيام العزيز اللي تمناني
تبي تدري وش القصه , وش المعنى , وش التفسير
وش اللي سهّر عيوني وخلا النوم ما جاني
وش اللي كسّر الخاطر كسورٍ ما لهن تجبير
وش اللي أرخص دموعي بجوف الليل بكاني
أبرسل لك مع ابياتي علاماتٍ بهن تبصير
وابوصف لك معالم جرح ينزف وسط وجداني
ابرسم لك شظايا خافقٍ متكسرٍ تكسير
وابنظم لك قوافي شعر فيها قصة احزاني
وابكتب قصتي معها عذر وارفع لك التقرير
انا المظلوم لكني بمفهومك انا الجاني
أنا شفتك على دربي ومن اجلك عكست السير
وانا مدري وش اللي يم ذاك الدرب وداني
لمحت اسمك مثل نجمٍ على نوره يطير الطير
وانا من يوم شفت اسمك فرحت وجيت لك عاني
تقابلنا انا وانته على صفحه بها تسطير
تهلي بي من اولها وبآخر سطر تجفاني
لقيتك تنتظر غيري حقيقه مابها تزوير
وانا اللي كنت اظن انك على الصفحه تحراني
تعيش الحلم مع صوره على التصغير والتكبير
تعزي قلبك العاشق وفيك القلب عزاني
سبحت بداخل اعماقك وغصت بغبة التفكير
ولاتحسب هواجيسك مع اللي راح تخفاني
حملت المسك باليمنى وباليسرى نفخت الكير
تداوي جرحٍ بقلبي وتفتق جرحٍ أشقاني
بخفي جرحك الدامي وابدفن سرنا بالبير
وابنثر ذكرياتك شعر للهاجس تغشاني
واذا نادمت هاجوسي ابذكر عشرتك بالخير
وابدعي لك إذا هب الجنوب وهيض اشجاني
عسى دومٍ معك يمشي رفيق بدربك التيسير
وأنا ماضيع من بعدك ولي رب تولاني
أنا يا صاحبي برحل وسامحني عن التقصير
أنا نفسي تعاف الزين إذا ما كان يبغاني
وتبي أفرز لك المعنى على الصافي بلا تكثير
واسّبِك صافي المعنى بقالب بيت وحداني
خلاص الوقت علمني حفظت الدرس بالتكرير
نصيحه لا تجي وان جيت ما ظنيت تلقاني
دمتـــــــ بـعز ـــــــــــــــــم
محبتكم
لـــــــــــ غرام ــــــــــــــــــــــذهـ
موضوع: نصيحه لا تجيني!! وان جيتني ماظنتي تلقاني 
الخميس نوفمبر 06, 2008 7:22 pm
